6歲就有睡眠窒息症？小朋友考試差咗都關鼻敏感事
2020-04-07
啱啱家長日，老師話六歲嘅俊仔近排上堂成日魂遊太虛，專注力差咗好多，詢問之下，俊仔一味話好攰、好眼瞓，老師都無晒符。
俊仔媽咪覺得好奇怪，明明阿仔瞓足九個鐘，點解仲咁攰呢？接住幾晚，佢特登留意俊仔瞓覺情況，發現年紀小小嘅佢，竟然晚晚扯鼻鼾。
俊仔媽咪於是帶佢去睇醫生，經過詳細檢查後，醫生診斷俊仔患上睡眠窒息症，而睡眠窒息症嘅源頭，竟然係鼻敏感。
鼻敏感或引致睡眠窒息症
鼻敏感同睡眠窒息症有咩關係呢？兒童呼吸科專科吳國強醫生解釋：「研究證實，鼻敏感會增加患睡眠窒息症嘅機會。當小朋友鼻塞時，佢哋會改用口呼吸，隨住嘴巴打開，下顎會向後，令舌頭下跌，阻塞上呼吸道，引致睡眠窒息。小朋友瞓得差，就可能出現專注力、行為同認知能力下降嘅問題。」
吳醫生補充，小朋友長期用口呼吸，有機會令下顎發育不良，睡眠窒息症就可能延續至成年，長遠增加患高血壓、二型糖尿病等疾病嘅風險。情況嚴重嘅患者可能要使用呼吸機，或接受顎骨矯型手術去處理睡眠窒息症。
《寶寶鼻敏感日記》有助及早發現問題
好似俊仔嘅個案，家長未必為意小朋友嘅鼻敏感已經非常嚴重，等到出現其他問題影響學習時先睇醫生。吳醫生建議，家長可以為小朋友填寫《鼻敏感日記》，記錄佢哋有無出現相關徵狀，例如鼻塞、鼻痕、流鼻水、打乞嚏等，或捽鼻、捽眼、打鼻鼾、用口唞氣等小動作。如果徵狀頻密已經影響患者嘅日常生活，就應該盡快求醫。