【Timtam仔成長日誌】生仔後才懂的二三事

生仔係好自然的事，相信好多人都會咁唸，尤其是餵人奶，唸住有胸部自然就會餵到！很多關於生仔的二三事，「自自然然」就會做到係我生仔前好天真的想法，亦冇人話我知原來「自然做到」背後其實經歷咗幾多辛酸、幾多堅持先會做到！

懷了第二胎，我又重走一次懷孕之路，在第二胎的媽媽谷認識很多新手準媽媽，想起自己成為媽媽已經兩年多，回望當初作為媽媽時的經歷，希望總結一些生仔後「如果當初有人早啲話我知就好喇」的二三事，希望幫到各準媽媽一些心理準備！ 當然每個人走的路都不同，不過有過來人事先話定邊到有捷徑，邊到有沿崖，自己袋定法寶有兩手準備，遇到困難時就不會徬徨無助！

1. 想順產生唔係由你話事

記得我懷Timtam仔時，最令我苦惱是選擇順產還是開刀！其實自己一直想開刀生，但自從係youtube睇過開刀生產過程，被人切開個肚的情景太震撼，最後就決定順產生！

之後我就做很多運動，行路、行路梯、做孕婦yoga，準備好身心理準備要順產生，結果我穿水催生捱了12小時陣痛後，最後因為Timtam仔心跳急跌而要緊急開刀！

一些朋友都唸住順產生，結果都因為種種原因最後都要開刀，如BB唔轉頭、或有妊娠糖尿問題，有朋友一直有做運動，一心唸住自己順產生完全冇問題，最後都係跟我一樣食咗全餐！

所以要順產生的話也不一定最後能如願，臨時會有很多變數，最緊要聽醫生指示，選擇一個最安全的方法生，只要媽媽同BB都能平安就好！所以就算決定順產生，都要有開刀生的心理準備！

2. 餵人奶唔係自自然然就餵到

我一直都以為，餵人奶咁自然的事一定會餵到！又唸住自己乳房都有些斤兩，餵人奶應該冇問題吧！

結果當然係我太天真！唔係話要奶就一定俾到足夠俾BB，每個媽媽體質不同，真係冇奶時用盡方法都係冇！又因為BB初初學習啜食人奶，好容易就會啜損乳頭，加上塞奶、石頭胸等問題，會令媽媽痛到入心，母乳路係一條崎嶇之路，一定要有披荊斬棘的戰鬥心！

當然每個媽媽都有自己的選擇，餵到就餵，餵唔到就餵奶粉吧！唔好用人奶奶粉嚟定義自己係咪好媽媽，人奶媽奶粉媽都係好媽媽，最緊要媽媽有好的心理質素去照顧BB！照顧初生BB已經夠辛苦，何況你我大部分都應該是食奶粉長大的，現在一樣健健康康！奶的問題就隨遇而安吧！