【安妮媽媽親子日記】餵母乳心情會影響奶量
2020-05-11
第一胎哥哥埋身飲奶到20個月，由初頭咩都唔識，又因為唔受泵，以為自己好小奶，每次泵奶都俾人話得咁少點點點，又叫我餵奶粉。。。受到好大壓力，都有懷疑過自己係咪真係唔夠奶水。
後尾先知道原來我係屬於唔受泵的母乳媽媽，但埋身飲就飲得好好，而且知道BB一定係夠飽。
因為有晒經驗，所以第二胎好快上手，一埋身就對啱位置，又唔會好似第一胎咁餵到個乳頭損晒勁痛，母乳姑娘都話餵的姿勢十分正確，而且已經上奶了，係好的開始。
弟弟真係好叻，啜得愈來愈好，愈嚟愈快。喺醫院的頭三日，每邊要餵半小時，每餐奶要餵一個鐘。番到屋企後每邊三個字，唔使一個星期，就可以每餐只飲一邊10分鐘就攪掂，而且媽媽我都成功調節到兩邊輪流餵的時間，估唔到可以咁順利，感恩！
今胎一早已經同自己講明要順其自然，餵到就餵，唔好俾壓力自己，可能心情放輕鬆的關係，奶路勁暢順，好開心！
唔理係餵人奶或奶粉都好，我相信每個媽媽都係一樣想俾最好的給BB。唔好理會別人的閒言閒語，媽媽放鬆心情先可以感受到湊BB的樂趣，大家一齊加油！
————————————————-
歡迎連絡安妮媽媽：
Facebook專頁： 安妮媽媽親子日記
IG: @Annie_mama_diary | 安妮媽媽親子日記
作者﹕安妮媽媽親子日記
其他文章﹕