【懷孕初期】頭暈頭痛 抑鬱無胃口2個月│80後新手飛行媽媽

懷孕頭1個月，食得瞓得，唔算大食，反而覺得自己細食咗，好易飽，

但每隔兩個鐘就會肚餓，所以嗰期都係少食多餐。

初期我仲有食魚生、壽司，

但後來知道對自己同BB唔好，就開始戒口，

上網亦搵咗啲孕婦餐單，希望自己食得健康兼有營養，

初初都想跟足營養餐單咁食。

但到孕期第2個月，害喜現象終於出現，

頭暈、頭痛、作嘔、無胃口、超醒瞓等…..

幸好我只係想嘔，無真係嘔，否則一定勁辛苦。

懷孕初期，我亦有少少抑鬱，喊過一兩次，

當時諗埋一邊，結咗婚，搬咗出嚟住，咩都要自己攪掂，

而且居住地方唔方便，附近無商場、街市，

只得一間餐廳同supermarket，但需要步行15分鐘先到，

一來一回就需要半個鐘。

覺得自己好慘，肚餓要自己買自己煮，

煮完無胃口食，唔食就掉(其實好浪費)，

肚餓又食唔落，餓得滯又想嘔。

所以嗰期好depressed，不過好快俾我諗到解決辦法，

作嘔、無胃口，依啲情況反反覆覆咗2個月。

踏入孕期第3個幾月就無再出現，好番好多。

不過都keep住頭暈頭痛，試過差啲暈低，

天旋地轉，睇嘢有星星，要平瞓先無事。

懷孕頭3個月，我都無返工，一直請病假，

日日喺屋企，有狗狗陪伴住，

每日起身做完家務就放佢出嚟玩，

定時定候又帶佢落街散步。

有狗狗喺度，即使日日喺屋企都唔覺得悶，

放假仲放到唔想返工添。

作者：80後新手飛行媽媽