疫情 ｜營養師病房篇 中招後的老人家
2022-06-06
第五波疫情來勢洶洶，二三月果陣開始爆得最勁，當時啱啱係我先生要離開香港嘅時候，果陣公立醫院越來越多普通病房變身隔離病房，除咗每日上病房睇呢啲確診病人外，身邊越來越多家人朋友同事相繼中招，我又怕自己中招傳染屋企兩位小朋友。呢段日子，獨自面對很難捱。
幸好工人姐姐非常幫得手，每晚放工返屋企已經煮好飯，小朋友功課做好大半；星期六日我又可以帶小朋友到長老屋企玩，我就乘機抖抖。
後來疫情高峰逐漸過去，本來以為工作應該相對輕鬆，但發現病房轉介營養師簡直係海量！ 好多中招後嘅老人家，狀態未能夠完全恢復過嚟，無胃口食，普遍體重都下跌5公斤甚至更多。營養師嘅角色係做營養支援，評估病人情況後，喺醫院有限嘅膳食選擇下，盡量額外安排有營養又合適嘅食物，例如粉麵、蒸水蛋、糖水、三文治、營養奶或果汁之類，協助病人盡快恢復狀態從而出院。
可惜有一部份老人家因為狀態太差，出現吞嚥困難或者長期拒絕進食，要插胃喉透過管飼餵食tube feeding去保持營養。另外有啲屋企人就選擇舒緩餵食comfort feeding。
幾年前喺報章專欄我都有寫過，「to feed or not to feed」，喺呢種情況下係好難取捨，要去到插胃喉tube feeding，好多屋企人都唔想，覺得老人家失去尊嚴；但有啲老人家狀態差，又真係可以幾個禮拜都拒絕進食，屋企人又會肉痛，怕老人家唔夠營養食唔飽。建議可以喺老人家精靈嘅時候，先詢問佢嘅意願，咁就到時知道可以點樣處理，合乎佢嘅心意，甚至設定「預設醫療指示」（advance directive），咁就連醫護人員都知道老人家意願。
tube feeding(圖片來源：營養師糖果媽媽 ‧ 從香港到英國)
tube feeding (圖片來源：營養師糖果媽媽 ‧ 從香港到英國)
近年冒起嘅舒緩餵食comfort feeding都係一個選擇，老人家可以繼續用口進食，由經訓練嘅醫護人員及家人去餵佢食。病房會轉介營養師，安排一啲老人家鍾意嘅嘢食例如糖水。又或者如果喺老人院飲開營養奶，我哋又可以安排返，目標希望老人家食得開心又keep到精神，營養足唔足夠就變得次要。有時病房甚至會叫屋企人帶啲老人家鍾意食嘅嘢，食返熟悉嘅味道。呢啲安排都令老人家活得更有尊嚴。
作者：註冊營養師糖果媽媽
文章及圖片授權：營養師糖果媽媽 ‧ 從香港到英國
其他文章：