生育問題｜年過35歲想當媽媽 打機狂老公恐成豬隊友 人妻列3件事：生咗仔我會好慘...
2022-12-12
生兒育女需要兩夫妻共識，如果一方仍然像個大細路，到底適合成為家長嗎？一名人妻在「香港討論區」以「想生仔，但覺得老公會是豬隊友」為題發帖，指自己已過35歲，開始要正視生育問題，但眼見老公「成個大細路」咁，煩惱到底「生唔生好」。
人妻指自己本來沒有生育計劃，但過了35歲，受到「女人天性+進入高齡的倒數」壓力，開始有生育意慾，擔心現在不生的話，將來會後悔，而老公則比她更想要小朋友，兩夫妻在半年前開始備孕，雖然很憧憬一家三口的家庭生活，但她卻認為老公會是豬隊友，又日日夜夜掛住打機，想像到自己「如果生咗仔會好慘…」，她列出丈夫的豬隊友三件事件，希望網友們給予意見。
1 新買口罩當垃圾掉
人妻指早前買了一袋口罩，用背心膠袋裝住放在枱面，當晚食完晚飯後，人妻表示因為太累所以先行休息，而丈夫主動幫忙洗碗和倒垃圾（這些家務平時都是由人安負責）所以老公難得地主動去倒垃圾，她心感安慰，但翌日發現檯面袋口罩不見了，原來老公前一晚當垃圾掉了，她非常崩潰。「我個心係覺得佢個人做屋企嘅嘢時就係咁樣囉，永遠咪埋眼咁做，冇用腦冇用心嘅，一袋嘢係咪垃圾都分唔到，叫你湊仔嘅話你會唔會餵咗奶又以為未餵，未換片又以為換咗？」
2 老婆煮緊飯，但老公突然叫外賣？
人妻分享老公最近放大假，繼續日日夜夜打機生活，有一晚她6:30PM左右在家煮飯，已經醃肉、洗菜、洗米，但老公突然打機期間用手機叫外賣，「佢個屎忽又唔可以離開張梳化，佢視線亦唔可以離開部PS5，冇問過我想食咩之餘仲唔知我喺廚房煮緊飯。」
人妻指當日才跟老公說過雪櫃有些菜放了很久，要煮來吃，責怪老公無心裝載。「佢叫完外賣冇耐，終於行過嚟廚房發現我煮緊飯，話死喇叫咗外賣添！之後佢又返去打機喇，好似冇事發生過咁，咁我已經覺得佢又係幫倒忙喇。」人妻指因為晚餐已煮好，建議外賣留翌日吃，於是當外賣到時，就把外賣包好準備放入雪櫃，怎知豬隊友卻開始食外賣。「我真係火都嚟，大佬你有冇望一眼睇下廚房發生緊咩事？大佬你覺得我仲喺廚房入面係做緊乜架呢？我就大聲嗌出去話D外賣唔食架喇，叫佢轉碗放入雪櫃，但佢都仲覺得好不可思議咁嘅，我真係唔明佢個腦諗乜…」
3 將外賣盒掉入廚房已滿的垃圾袋
事件未完，老公後來將外賣轉碗放入雪櫃，然後把外賣盒掉入廚房那個已經滿了的垃圾袋，但人妻已開了一個新的垃圾袋在旁邊，沒多久，裝滿垃圾的垃圾袋就倒塌了，外賣盒和餸菜汁也倒瀉了。「我只係覺得，你有用個心用對眼去睇吓諗吓，做嘢就唔會咁求其… 係，你塞爆舊嗰個垃圾袋係得，但有個新嘅喺隔籬你又睇唔到嘅？用新嗰個唔係好啲咩？唔係你覺得我開個新嘅垃圾袋出嚟係做乜？裝飾？」
人妻表示上述的事件令她不斷反思，老公真是適合做爸爸嗎？「好多嘢係見微知著，呢兩件事都只係最近發生我先攞出嚟講，但其實好多時都會有啲事係睇落好小事，但會令我覺得佢唔適合做爸爸，或者令我覺得如果有咗小朋友我會好無助。其實我而家呢個年紀，已經冇空間去嘥時間同猶豫，而且有時啲嘢都唔係話你想生就即刻有，但而家我真係唔知究竟仲試唔試好。」
更多文章：
家用問題｜哥哥一家四口每月只給4000家用 要兩老包食包住包湊孫惹議
夫妻關係｜結婚5年丈夫從沒給過家用 全職媽媽：通常做家務先有$20收
