【傑。斯與晴】小JM料理 有益腸道 至營野菜粉牛奶布甸
2017-10-27
小JM媽我本身嘅腸胃比較敏感，好容易食到啲稍為不潔或油膩嘅食物時就會造成肚瀉，嚴重嘅有時仲會引致腸胃炎添。而小JM呢，喺我肚入面嗰陣曾經照到腸道有光影，所以我成個孕期都需要照超聲波去監察小JM嘅腸道健康問題。（政府同私家兩邊走）
到小JM加固後期，明顯地見到小JM去Bubu嗰陣比較辛苦，小JM嘅膳食其實一直都係多菜少肉，但Bubu依然都係咁辛苦，有時仲會因為去Bubu嘅問題而搞到坐立不安同大喊添，當媽嘅又點會唔擔心。為咗緩解小JM去Bubu嘅問題，我亦試過買不同品牌嘅益生菌俾小JM飲，但好可惜，問題依舊存在。
講真，每當我見到小JM因為去Bubu而搞到喊晒嗰陣，個心真係好痛，亦覺得好自責，因為可以做嘅都做晒，但仍然幫唔到小JM紓緩不適。（已經有試過按摩肚仔，搽Cream都一樣唔得！）