兒童健康︱營養師病房篇腸胃炎的季節︱註冊營養師糖果媽媽

2022-06-30

踏入夏天，又到左腸胃炎嘅季節喇！近來又多番小朋友因為肚痾而入院。上星期喺兒科病房就見咗一位只有10個月大嘅小朋友，因為肚痾咗超過一個星期，每日屙八次水狀便便，又唔肯食嘢唔肯飲奶，所以父母最後送佢入院。

小朋友要肚痾到入院，通常都係肚痾次數好多，如果加埋唔肯食嘢唔肯飲嘢，仲要有發燒嘔吐呢啲情況，就會令到身體缺水情況加劇，就有可能要入院處理。
醫生會安排驗大便，睇吓有冇種到菌或者病毒，常見嘅有輪狀病毒（rotavirus)、樂沃克病毒(norovirus)、或者沙門氏菌(salmonella)。即使感染好返，亦有可能因為腸胃炎後引發嘅短暫乳糖不耐(lactose intolerance)而繼續肚痾，有時前前後後都可以一兩個星期先好返。

呢位10個月大嘅小朋友每餐只飲到幾十毫升奶，固體更加完全食唔到，病到第八日但一日依然屙緊8次水狀便便，所以醫生安排咗吊鹽水去補充水份同電解質。另外轉介營養師，暫時轉用豆奶配方，因為豆奶裏面無乳糖成份，可以舒緩肚痾情況。所以我就見咗呢位媽媽，去講解返豆奶配方嘅資料。

（解話：國際指引話如果小朋友食開母乳，可以繼續食；如果小朋友食開配方奶，唔需要溝稀奶粉或者轉用無乳糖嘅配方。但指引亦都有講，如果小朋友需要住院或肚痾超過七日，就可以考慮減少飲食裏面嘅乳糖。所以就呢位小朋友嘅情況，醫生希望佢暫時轉用豆奶配方亦好合理）

醫生好多時會處方電解質飲料(ORS)俾小朋友補充水份同電解質。亦有啲研究指出，溝稀咗嘅蘋果汁（diluted apple juice )對輕微腸胃炎嘅小朋友去補充水份可能有幫助。腸胃炎嘅小朋友胃口差係好常見，可以少食多餐，安排一啲易入口嘅食物，例如粥、粉麵，亦可以喺食物裏面額外添加調味料去補充鹽份。最緊要係飲充足流質，包括ORS、水份、湯水、豆奶等等。

有啲私家醫生甚至會處方益生菌，因為研究指出益生菌可以改善肚痾情況及縮短生病日數，但並唔係每一隻益生菌都會有幫助，比較多研究嘅係Lactobacillus rhamnosus GG、Saccharomyces boulardii同L reuteri DSM 17938⋯⋯ 至於點樣食法，最好問返私家醫生或者營養師。

記得我大仔13個月嗰陣（都成5年前）都有試過腸胃炎，次次去poopoo都爆片（就好似第二幅圖咁），作為新手媽媽嘅我非常緊張，出去同佢撲ORS、益生菌、買埋豆奶配方，好彩佢只係肚痾少過一個星期，都食到嘢飲到嘢，最後唔使入院。因為親身經歷，所以5年前喺頭條寫過呢個topic ，可以參考返：【黃思敏營養師】腸胃炎高峰期小朋友飲食要小心