【許許與小BELLA】親子共食：足料福建炒飯
2019-06-21
隨住Bella日漸長大，除咗我哋食麻辣咖喱之類會刻意煮俾佢外， 一日三餐佢都已經可以跟我地大人食， 其實對我哋黎講都係好事， 變相我哋食嘅都會清淡有營啲， 今次我煮咗個健康版福建炒飯，全個飯嘅調味都只係落鹽，整個飯味嘅靈魂就是靠「香菇」了！
唔知大家仲記唔記得我上次去九州， 就買了好多椎茸返嚟， 呢隻菇真係好香，浸菇嘅水最適合用來打獻， 你哋亦都可以用花菇或者香冬菇來做。
親子共食：足料褔建炒飯
材料（一大一小份量）：
蛋一隻
椎茸兩大隻（或用冬菇）
紅蘿蔔一小片
芥蘭菜頭三支（怕苦也可用菜芯頭）
雞柳兩條
蝦仁六至七隻
小帶子八粒
白飯一碗
生粉一湯匙
水
預備：
1. 洗淨椎茸，用熱水浸軟，切絲（或粒）備用。
2. 洗淨雞柳、帶子與蝦仁，雞柳切粒，全部材料澀乾水後，放半茶匙鹽醃半小時，備用。
3. 把蘿蔔及菜頭切粒，放進水中煮5分鐘，瀝乾水備用。
4. 蛋打勻備用。
做法：
1. 鑊中放少許油加熱，確定滾熱後，大火放入白飯，分散壓碎炒鬆 。
2. 盡量把白飯平舖，大火加入蛋液。
3. 蛋液滲入白飯後，快手炒均勻，並炒至乾身，盛起備用。
4. 鑊中加少許油，大火放入雞粒炒至五成熟，再放入蝦仁及帶子粒。
5. 炒至八成熟後，加入蘿蔔粒及菜頭粒炒勻。
6. 把約120ml的浸冬菇水，加入生粉中拌勻。
7. 把生粉水加入材料中炒勻，至收為獻汁，加鹽試味後。
8. 把餸料淋上蛋炒飯上即成。
作者：許許與小BELLA
其他文章：
