去濕湯 合集 |清熱消腫簡單易煲排走體內濕氣

2020-09-17


去濕湯 有助清熱消腫排走體內濕氣。「濕」主要分為內濕和外濕。「內濕,顧名思義是指各種原因引起的脾臟生理功能失常、體內水分停聚所形成的病理狀態,最常見於春天和夏秋之間。一個人濕氣重就容易攰,呢個時候最好煲返D 袪濕湯水 ,有助清熱消腫!想煲一家大小都啱飲的去濕湯水,就要睇以下Oh! 爸媽Blogger嘅推介咧!

 1. 准山赤小豆扁豆 祛濕湯

天氣又濕又熱,總係會令人頭脹脹身腫腫咁,成日都攰攰冇精神,所以就煲多啲袪濕湯,好好調理下自己嘅身體。赤小豆同扁豆可以話係夏天多數煲嘅湯,因為扁豆可以健脾和中、消暑化濕。赤小豆就利水除濕,和血排膿,消腫解毒。朋友教用生熟薏米、北芪及准山一齊煲,除可以清熱袪濕外,仲可以健脾胃、強肺同預防感冒。

材料

豬肉眼$35、果皮1小角、無花果4至5粒、生熟薏米、北芪、准山、赤小豆及扁豆,藥材份量方面你同藥材店職員講大約幾多人飲用,佢就會幫你執份量啦~

做法

1. 豬肉洗乾淨,氽水準用;果皮浸透去囊;其他藥材浸洗一陣備用~
2. 煲內放約3L水,然後加入果皮~
3. 水滾後放入所有材料~
4. 待水再次滾起時,先繼續用大火煲約15分鐘,然後轉慢火加蓋煲5小時~
5. 最後加入少少鹽調味,就可以飲啦~

溫馨提示
由於材料涉及藥材成分,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

2. 鳳梨苦瓜排骨湯

菠蘿可以消暑解渴、袪濕消腫;苦瓜可以散熱解毒;黃豆健脾益胃,所以呢個湯可以清熱潤燥,好啱夏天飲用。

材料

菠蘿一個、苦瓜一個約一斤(由於我買依兩個係細SIZE)、蜜棗四粒、黃豆約半飯碗及排骨約$40~

做法

1. 排骨洗淨汆水備用;蜜棗及黃豆浸洗一陣~
2. 苦瓜去籽切塊,汆水後瀝乾,汆水可以減少那一種苦味~
3. 到處理好似係最困難嘅菠蘿。初時我都唔識去皮,但原來唔係好難,好似切西瓜咁先嚟一開四~
4. 之後慢慢切開層皮、去釘
5. 然後將菠蘿切塊~
6. 煲內放約6L水,待水滾後加入所有材料~
7. 待再次滾起時,用大火加蓋煲約三十分鐘~ 
8.轉慢火加蓋煲多一小時~
9.最後加入少少鹽調味,就可以飲啦~

初頭我都有丁點擔心個味會好怪,又或者啖湯會好苦,不過入口又真係冇咗依個擔心。其實菠蘿嘅甜味係平衡到苦瓜嘅苦味,所以飲落係有苦瓜嗰一種味,但就一啲都唔苦,飲落仲甜甜添~

溫馨提示
雖然苦瓜對消暑清熱係好好,不過佢嘅屬性比較涼,所以係好因應個人體質,大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

3. 牛大力土伏苓粉葛豬骨湯

天氣帶點潮潮濕濕,又真係好容易令人皮膚搔癢,成日好似易倦兼腰痠背痛,所以今日去街市買材料煲湯時,店主就介紹我煲依個牛大力土伏苓粉葛豬骨湯啦!

聽個名好似好複雜,我初頭都有啲抗拒,打算簡單買個紅菜頭嚟煲就算。不過店主又好詳細咁同我介紹,一聽到話可以祛濕解毒,好啱濕疹人仕飲,我已經有一半興趣。再聽埋話佢會幫我切好晒,返屋企只係沖洗一下就煲得,所以就請店主幫我執一份材料試下煲啦!

材料

牛大力 4兩、土伏苓 4兩、粉葛一件、赤小豆及扁豆約一兩、豬尾骨$50、果皮2片及蜜棗4粒~
土茯苓–除濕解毒,通利關節,治療皮膚痕癢~
牛大力–補虛潤肺,強筋活絡,治療腰肌勞損,風濕關節炎~
粉葛–解熱退燒,降低血糖,透疹止瀉,治療熬夜頸背筋骨酸痛~

做法
1. 牛大力、土伏苓及粉葛由於已經切好晒,所以用水沖洗幾次就得(真係好方便哦);蜜棗、赤小豆及扁豆浸洗一陣;果皮浸軟刮囊;豬骨汆水~ 
2. 煲內加入約4L水,然後加入果皮~
3. 待水滾後加入所有材料~
4. 繼續用大火加蓋煲約30分鐘~
5. 之後轉慢火加蓋煲多2小時~
6. 最後加鹽調味,就飲得啦~

味道又唔係好差,只係我比較少煲依啲山草藥湯唔多習慣,同埋豆味重咗啲啲,所以小小豬唔鐘意飲,我同老公都覺得唔錯,同埋間中解下身體嘅毒,人都健康啲呀!

溫馨提示
個人體質有所不同,我啱飲時又未必每個人都啱,所以大家記得煲之前了解下自己,或者問下相熟中醫/藥材店職員,呢個湯料啱唔啱自己呀!

4. 雲苓蓮子薏米南豆黃瓜 祛濕湯

天氣需要袪濕,請教相熟藥材店職員,最後佢教我煲雲苓蓮子薏米南豆黃瓜湯。

大部分材料我都有少少認識,雲苓有健脾祛濕嘅功效;蓮子就可以清心醒脾,補中養神,健脾補胃;薏米就唔洗講都知係袪濕良方啦!

只係南豆嚟講就有啲陌生,原來南豆又叫做南扁豆,對健脾益氣、袪濕消暑都好有幫助,所以如果唔鐘意赤小豆及扁豆嗰個重豆味時,可以改用南豆,因為功效都係差唔多呀!

依幾樣藥材加埋個黃瓜一齊煲,就可以健脾、袪濕、補氣,最重要係煲出嚟白雪雪又甜甜哋,小小豬應該會鍾意。

材料

都唔算係好多,豬肉眼$40、黃瓜1個、蜜棗4-5粒;雲苓、蓮子、薏米、南豆,藥材份量方面你同藥材店職員講大約幾多人飲用,佢就會幫你執份量啦~

做法
1. 瘦肉洗淨汆水備用,藥材就浸洗一陣~
2. 黃瓜去籽切塊,切大嚿啲都唔怕,因為太細煲完湯就冇得食啦~
3. 煲內放約3L水,水滾後放入所有材料~
4. 待再次滾起時,先繼續用大火煲約15分鐘~
5. 然後加入黃瓜~
6. 用大火煲約15分鐘,再轉慢火加蓋煲5小時~
7. 最後加入少少鹽調味,就可以飲啦~
8. 千祈唔好漏咗啲黃瓜,煲過湯嘅特別好味,簡直係我至愛呀~

今次終於唔洗三吹四請,小小豬自動自覺拎碗湯嚟飲,仲要求我下次再煲依款湯添。得佢咁支持我梗係開心,所以都要去執多幾份材料,煲多幾次俾佢飲先得呀!

溫馨提示
由於材料都涉及藥材成分,所以係好因應個人體質,大家記得煲之前了解吓自己,或者問吓相熟中醫/藥材店職員,呢個湯料啱唔啱自己呀!

5. 蘆根薏米雪梨水

我最初只係打算用薏米嚟煲雪梨水,正當我去藥材買材料時,店員就叫我打埋蘆根、銀花同甘草一齊煲,有清熱袪濕同埋潤肺生津等功效,而且仲話對濕疹好好,可以清下啲內熱添。一聽到話對濕疹好,梗係即刻執返份材料返屋企煲啦!

材料

就有雪梨四個,蘆根、薏米、銀花及甘草。基本上所有材料係藥材店都可以買到,只需要同店員講有幾多人飲,佢就會執所需份量,我三人份量都只係$15~

做法

1. 雪梨洗淨去核切塊~
2. 所有材料要浸洗半小時~
3. 將全部材料及1L水放入煲內~
4. 待水滾後轉用慢火煲約1小時,咁就煲好啦~
5. 待涼後入樽,就可以飲得啦~

蘆根我之前都煲過,所以都知道有少少庶味,今次加埋雪梨一齊煲,甜甜地又幾好飲,小小豬都飲得好樂意添~

店員仲教我依個涼茶可以清臟腑熱,如果準備接種預防疫苗嘅小朋友服用,咁就可以可減少打針後不適。不過……藥材依方面都係好因應個人體質,所以記得煲之前了解吓自己,或者問吓相熟藥材店職員,依個藥方啱唔啱飲呀!

6. 無花果 雪梨薏米水

無花果我多數用嚟煲湯,用嚟調味為主。不過原來用嚟做主角都一樣係好正,因為無花果係好有益,可以補血氣、強體質、滋潤喉嚨、幫助皮膚鎖水、祛水腫同埋潤腸,減少便秘。

無花果再加埋雪梨就夠晒滋潤,再加埋薏米一齊,就可以有埋祛濕同祛水腫嘅功效,真係飲完可以即刻潤返晒,飲完仲唔即刻靚返晒。

材料

雪梨4個、無花果6粒、生薏米及熟薏米各半碗~

平時我煲湯就用普通細細粒嗰啲無花果,不過我今次就買左大大粒嗰啲土耳其無花果,咁煲出嚟嘅味道就會甜啲,咁就可以連冰糖都唔洗加呀~

做法

1. 生熟薏米先浸1小時;無花果略沖洗後切開一半(咁就可以易啲出味);雪梨去芯切件~
2. 煲內放入3L水,然後將所有材料加入煲內~
3. 待水滾後,用大火加蓋煲約15分鐘~
4. 然後轉慢火加蓋煲多一個鐘~
5. 煲好之後就可以試吓味,如果有需要就可以加少少冰糖調味。不過我就覺得只係用無花果都夠甜,所以就冇加冰糖都好好飲~

有小小豬鐘意飲嘅雪梨水,加上味道又甜甜地,依隻豬仔都好鐘意飲呀~

除咗滋潤之外,平日食得多熱氣嘢、捱夜或睡眠不足(即係我啦),都好啱飲呀!

溫馨提示
由於材料都涉及藥材成分,所以係好因應個人體質,大家記得煲之前了解吓自己,或者問吓相熟中醫/藥材店職員,呢個湯料啱唔啱自己呀!

7. 羅漢果粟米芯茶

上網見有朋友仔介紹,話將羅漢果加埋乾粟米芯一齊煲,甜甜地得嚟味道又唔錯,仲對清熱解暑同祛濕有幫助,咁就啱晒潮濕嘅天氣飲。

乾粟米芯有利尿減肥、清熱、消暑祛濕 利尿祛濕功效;羅漢果有清熱解暑、化痰止咳、涼血舒骨、清肺潤腸和生津止渴等功效。

問過我相識嘅藥材店老闆,佢都話依條方啱小朋友夏天解暑祛濕飲,所以就買材料又試下小小豬飲唔飲先。

材料
就只係兩樣,乾粟米芯約一兩半及羅漢果一個~

做法
1. 乾粟米芯水浸洗一陣;羅漢果壓碎~
2. 煲內放入三公升水,然後加入乾粟米芯及羅漢果~
3. 待滾後,加蓋用大火煲三十分鐘~
4. 之後轉小火煲一小時~
5. 熄火後就要即刻夾起啲材料,因為如果浸得耐,個羅漢果甘味就會重啦~
6. 待涼後就飲得啦~

未俾小小豬飲之前,我當然都有試飲半杯(因為我本身係寒底,唔太接受到羅漢果個性質,所以只係飲少少就好了),估唔到個味又真係甜甜地,仲帶有香香地嘅粟米味,而且羅漢果那一份甘味煲後又唔算太強,所以小小豬都幾鐘意飲哦~

溫馨提示

由於材料都涉及藥材成分,所以係好因應個人體質,大家記得煲之前了解吓自己,或者問吓相熟中醫/藥材店職員,睇下呢個湯水啱唔啱自己呀!

8. 赤小豆排骨湯

屬溫和袪濕湯。赤小豆有消腫利尿健脾胃的作用,薏米同樣健脾清熱、排水利尿,更有美白作用,加入紅棗除了補氣補血,味道更香甜。

材料

赤小豆40g;生薏米40g;扁豆40g;紅棗8粒;排骨半斤;蜜棗3粒;水3L

做法
1.  排骨洗淨及出水備用
2. 赤小豆、生薏米、扁豆、蜜棗及紅棗(開邊去核)洗淨略浸備用
3. 將所有材料放入高壓煲煲20分鐘,於喝前再大滾一下便成(若用一般煲具,則以大火煲滾,再用文火煲3小時便成)

9. 節瓜章魚花生眉豆湯

章魚又名八爪魚,為益氣養血食材,含豐富蛋白質及礦物質,還含抗疲勞、抗衰老等重要保健因子,深受不少人仕歡迎。

這個節瓜章魚花生眉豆湯,亦是一款合家湯水,更適合母乳餵哺人仕,能增加乳汁分泌,補血養顏。不熱不寒的節瓜則有預防感冒,清腸胃利小便,補腎及養顏潤膚的功效。眉豆健脾去濕,花生潤肺補血,瑤柱則滋肝補腎。

材料

章魚80g;節瓜2個;花生40g;眉豆40g;瑤柱4粒;蜜棗3粒;豬展$30;水 3L

做法
1. 節瓜去皮切件備用
2. 章魚切件,跟花生、眉豆、瑤柱及蜜棗略浸備用
3. 豬展出水備用
4. 將所有材料放入高壓煲煲20分鐘,於喝前再大滾一下便成(若用一般煲具,則以大火煲滾,再用文火煲2-3小時便成)

10. 赤小豆粉葛鯪魚 祛濕湯

此湯有助清熱袪濕袪骨火,而且味道鮮美丁點鹽也不用下,是款健脾強體、四季適合的合家湯水,不用推介,家中各人也添飲以示支持。

粉葛有清熱、生津止渴及舒緩肌肉酸痛的功效;赤小豆及扁豆有袪濕暖胃的作用;紅蘿蔔益肌明目、有助增強免疫功能;蜜棗則有補脾胃、止咳潤肺化痰等功效;鯪魚補氣活血。

材料

粉葛約1斤;紅蘿蔔1條;鯪魚1條;扁豆80g;赤小豆40g;豬展$30;蜜棗2粒;薑2-3片;水3L

做法
1. 粉葛、紅蘿蔔去皮切件備用
2. 扁豆、赤小豆、蜜棗洗淨略浸備用
3. 豬展切件出水備用
4. 下油爆香薑片,放入鯪魚每邊煎約3分鐘
5. 除鯪魚外,將所有材料放入高壓煲煲至水滾,再放入已煎鯪魚煲20分鐘,於喝前再大滾一下便成(若用一般煲具,則以大火煲滾,再用文火煲2-3小時便成)

11. 粉葛黨參螺頭螺片湯

袪濕湯可幫助排走體內濕邪,趕走濕悶乏力、沒精力胃口等問題,飲完令人感覺舒適一點。這次選用百搭的黨參,能令湯水更香甜,亦能平衡體質。

黨參:補中益氣健脾胃
螺頭螺片:滋補養顏,滋陰補腎
粉葛:袪濕利水,去骨火
花豆:健脾壯腎;扁豆健脾胃
赤小豆:補血消腫,利尿健脾胃
薏米:利水清熱
陳皮:理氣健脾
蜜棗:補中益氣。

材料:
黨參 40g、螺頭 3隻、螺片 2片、粉葛 1斤左右、紅蘿蔔 1條、花豆 80g、扁豆 80g、赤小豆 40g、薏米 40g、陳皮 1/4片、蜜棗 2粒、豬骨 $50、水 3L

做法:
1. 先將螺頭、螺片略浸
2. 豬骨出水備用
3. 粉葛及紅蘿蔔洗淨去皮切件備用
4. 花豆、扁豆、赤小豆、薏米、蜜棗洗淨略浸備用;果皮浸軟去囊備用
5. 將所有材料放入高壓煲煲20分鐘,於喝前再大滾一下便成。
(若用一般煲具,則以大火煲滾,再用文火煲2-3小時便成)

12. 粉葛赤小豆扁豆豬骨湯

粉葛:止渴除煩、清熱、去骨火
赤小豆:健脾袪濕、利尿消腫
扁豆:健脾化濕
紅蘿蔔:健脾胃、益肝明目
蜜棗:補氣止咳潤肺。

材料:

粉葛 1/2至1個、赤小豆 40g、扁豆 40g、紅蘿蔔 1-2條、豬骨 $40、蜜棗 3粒、果皮 1/4片、水 3L

做法:
1. 豬骨出水備用
2. 紅蘿蔔及粉葛去皮切件備用
3. 赤小豆、扁豆、蜜棗洗淨略浸備用
4. 果皮浸軟去囊
5. 將所有材料放入高壓煲煲20分鐘,於喝前再大滾一下便成。(若用一般煲具,則以大火煲滾,再用文火煲2-3小時便成)

13. 老黃瓜淮山素 袪濕湯

今日就煲番個夏日當造嘅老黃瓜湯,來解暑袪濕。 以腰果,粟子來代替肉 ; 再加上淮山,健脾益肺腎。 一家大細都啱飲!

老黃瓜﹕清熱解暑,袪濕
淮山 ﹕健脾胃,益肺腎
栗子﹕養胃健脾,增強食慾
腰果﹕補腦養血、補腎健脾

材料:

老黃瓜 1個 、紅蘿蔔 1個、 赤小豆 2両、扁豆 2両、淮山 1枝、粟子 12粒、 腰果 半碗、果皮 1瓣、水 3L

做法:

1. 果皮用清水浸軟,刮囊。
2. 腰果、粟子、赤小豆、扁豆浸洗淨,備用。 
3. 老黃瓜洗淨切開,留皮,刮去瓜瓤,再切件。
4. 紅蘿蔔去皮,洗淨,切件 。
5. 淮山刨皮,切件。
6. 煲入注入水,將所有材料放入煲內,滾起,以大火滾15分鐘,轉慢火煲1.5個小時,加入少許鹽調味,完成。

小貼士:

– 刨淮山皮前最好先戴上手套, 因為鮮淮山肉有滑滑的黏液, 戴手套可免跣手,而且黏液會令人手痕,所以最好全程戴上手套,直到將淮山放入煲內為止。

14. 赤小豆粉葛紅蘿蔔薏米 祛濕湯

呢排天氣不穩,時不時就落大雨,濕濕立立。

連日嚟,又攰又提不起勁兼腰酸肩痛,煲番個健脾祛濕 、 解肌舒筋嘅粉葛湯。

赤小豆: 健脾袪濕、利尿消腫
粉葛: 清熱、解肌舒筋、去骨火
生薏米: 微寒,利水祛濕
熟薏米: 健脾益胃

材料:

粉葛 1斤半、赤小豆 1兩、生熟薏米 1兩、紅蘿蔔 1個、肉 30蚊、蜜棗 3粒、果皮 1瓣、水 3L

做法:

1. 粉葛及紅蘿蔔去皮,切件備用。
2. 赤小豆、生熟薏米、蜜棗浸洗淨,備用。
3. 果皮用清水浸軟,刮囊。
4. 肉汆出水備用。
5. 煲內注入水,將所有材料放入煲內,大火滾15分鐘,轉小火煲2小時,下少許鹽調味,完成。

小貼士:

– 孕婦不宜飲用。
– 如怕生薏米寒涼,可將生熟薏米改用扁豆。
– 可加入粟米或老黃瓜同煲。

15. 竹蔗粟米鬚蘋果茶

漸入春季,時冷是熱,時晴時雨,濕立立,令人唔舒服,呢款竹蔗粟米鬚蘋果茶 好啱潮濕嘅天氣飲。

粟米鬚-清熱利尿、袪濕
竹蔗-味甘清熱
蘋果-生津潤肺、益氣開胃

材料:

竹蔗 1札、粟米鬚 12兩、蘋果 3個、水 約2.5L

做法:

1. 竹蔗洗淨,一開二。
2. 粟米鬚洗淨。
3. 蘋果用刀刮去表面的蠟,洗淨,去芯,切件。
4. 煲內注入水,放入所有材料,大煲滾15分鐘,轉小火煲45分鐘,完成。(可按自己喜歡的甜度,加入冰糖)

小貼士:

– 飲用之前,要了解自己的體質是否適合飲用。
– 按個人喜好,加入無花果或馬碲或糖冬瓜。

16. 魚腥草竹蔗甘筍薏米水

小朋友病比大人病更慘, 相信每位家長也身同感受。 雖說小病是福, 小朋友偶然小病也是成長的過程和增強自身免疫力, 但小朋友一病, 要餵藥仿如打仗般, 好不容易強行餵了(說得準確點是灌下去。。) 轉頭可能來個嘔吐大作, 前功盡廢。 尤其一歲至三歲前的階段, 小孩還未明白吃藥的道理, 利誘也行不通, 所以這個階段, 除非不吃藥不可的疾病, 否則我都以自然療法來為小朋友治病。 當中少不了保健食療。 

魚腥草有植物抗生素之稱, 有清熱, 抗炎, 排水利尿, 通淋巴等功效。 對流行性感冒, 金黃葡萄球菌等病毒, 口腔潰瘍也有抑制作用, 能提高自身免疫力。 同時亦有化痰去濕, 平喘, 抗腫瘤的功用。

材料:

魚腥草 4兩、竹蔗 1條、茅根 1紥、甘筍 1條、馬蹄 5-6顆、生熟意米 各1兩、糖冬瓜 數塊

做法:

把全部材料切片(可在購買時叫菜檔代為去皮和切件) 浸洗乾淨後, 加水7-8碗水慢煲45分鐘至出味。 這個茶味道十分清甜, 不用加糖也很可口。 即使平時作保健茶也很適合, 一家大細也能飲用。

小貼士:

*每人體質不同,以上湯水含有不同藥材,在飲用前請先向註冊中醫師查詢。

17. 粟子淮山杞子排骨 袪濕湯

天氣開始潮潮濕濕, 乍暖還寒, 又是病菌滋生的季節了. 每年這個時侯, 濕疹都很易發作, 除了要多飲 袪濕湯水 外, 要身體打好底子, 健脾也十分重要. 脾藏的功能是幫助食物消化和吸收, 同時跟神經、代謝、免疫、內分泌等系统的功能有關, 因此脾臟某情度上跟人體免疫力亦息息相關. 經常飲凍飲, 吃煎炸油膩重口味食物,會有損脾胃功能. 健脾去濕是春天的主要食療, 今次介紹一個十分可口美味, 又能健脾的湯水給大家, 一家大細都岩飲。

材料(4人份量) :

鮮淮山 1條、粟子 半磅、紅蘿蔔 1條、杞子 1/3杯、排骨粒 半斤、薑片 數片

做法:

1. 選用蒸煮排骨粒, 肉味更易滲入湯水中, 先把排骨粒汆水洗淨
2. 燒一鍋水, 未水滾加入排骨粒, 粟子, 淮山, 薑片同煲
3. 滾後細火煲1小時, 然後加入杞子滾10分鐘, 加鹽即可。

這個湯水相當鮮甜, 而且連渣也能吃掉. 天氣潮濕, 容易疲倦, 胃口也欠佳, 不妨煲這個湯水補充營養, 增加食慾. 小朋友都好適合飲~~

18. 粟米鬚生熟薏米水

一杯味道清甜,冷熱皆宜的粟米鬚生熟薏米水,可清熱利濕及消腫。
此茶飲具清熱袪濕、消水腫等效用,冷熱皆宜,適合在潮濕的春夏天飲用。
生薏米性寒,熟薏米寒性較輕,兩者功效大致相同,
只是生薏米較寒涼,加入熟薏米同煮可有助中和寒性。

材料:
粟米鬚 300克、生薏米 58克(約一両多)、熟薏米 38克、
糖冬瓜 80-100克(甜度視個人喜好)、清水 10杯

做法:

1. 粟米鬚浸泡,洗淨;生熟薏米浸泡,糖冬瓜沖洗乾淨。
2. 燒滾水,加入所有材料煮滾,蓋上鍋蓋。
3. 以小火煲約一小時至出味,熄火;即可飲用。

溫馨提示:
– 給小孩飲用可減少糖冬瓜的份量及洗掉表面的糖,避免過甜。
– 此茶具清熱袪濕、利小便、消水腫等效用。
– 同時,冷熱皆宜,適合在潮濕的春夏季節飲用。
– 糖冬瓜富營養,具有清熱生津止渴之效;帶有甜味,故不用額外加糖。
– 生熟薏米和糖冬瓜等材料可於街市雜貨店或藥材鋪內選購。

19. 糖冬瓜消暑祛濕茶

日日熱到咁…去街市買餸真系大汗疊細汗架…見到有消暑祛濕茶即買,加幾粒糖冬瓜,做返碗消暑茶降溫先!

材料:
消暑祛濕包 1包、糖冬瓜 8條、水 2.5公升

做法:
1. 薏米沖洗乾淨,用水浸10分鐘,備用;
2. 其他祛濕包材料都沖洗乾淨;
3. 水滾後放下所有材料,大火煲10分鐘,然後轉細火繼續煲2小時便完成

功效:消暑解渴,利尿袪濕,清熱排毒

20. 鮮淮山螺頭湯

凍凍濕濕熱熱又濕濕,總之好濕呀﹗

大家一齊嚟整返個靚湯去濕健髀啦~

材料﹕
新鮮淮山 1條、紅蘿蔔 1個、合掌瓜 1個、乾螺頭 2個、日月魚 1份約10個、圓型豬展 1個(我呢個60蚊)、無花果乾 2粒

做法﹕
1. 螺頭同日月魚清洗後用熱水浸軟(約4-5小時)
2. 豬展切件,連薑蒜跑活水後洗淨備用
3. 紅蘿蔔去皮滾切,合掌瓜刷乾淨表皮後切件
4. 戴手套﹗戴手套﹗戴手套﹗戴手套﹗戴手套﹗戴手套﹗
5. 戴手套後將新鮮淮山去皮,切片,避免汁液彈到皮膚
6. 湯煲預備約3公升水,水滾後將全部材料掉晒落去,中火煲15分鐘後轉小火煲2小時,完成 有新湯飲好開心。

小貼士:

– 千祈唔好徒手去掂新鮮淮山,一定要戴手套﹗戴手套﹗戴手套﹗很重要所以說三次﹗
– 若然戴咗手套都好不幸地俾淮山汁液彈到皮膚,先用醋洗彈到嘅地方,再開爐離火烘一烘彈到嘅位置,咁就好快止痕
– 紅蘿蔔揀啲粗身啲就甜㗎喇

內容提供:

1-7 去濕湯 水:小小豬廚房
8-12 去濕湯水 :Sammy Says
13-15 去濕湯水 :鄭小B之成長日誌
16-17 去濕湯水 :QB媽媽
18 去濕湯水 :小高廚房
19 去濕湯水 :Kelly’s Kitchen
20 去濕湯 水:米豬媽媽

熱門文章

蘋果雪梨水 簡單易整清熱潤肺之選|小小豬
01-08
蕃茄薯仔豬骨湯 食譜|一個簡單食材增清甜味【小小豬】
02-05
親子食譜︱無糖黑豆漿
09-20
親子食譜︱免焗檸檬芝士蛋糕
09-17
鱷魚肉湯 合集|止咳湯水潤肺化痰,改善哮喘氣管敏感
02-10

親子食譜︱無糖黑豆漿
2021-09-20
食譜分享│為小朋友增強抵抗力 Easy無花果羅漢果雪梨水!│Kylife
2021-09-18
親子食譜︱手抓紅豆肉鬆蛋黃酥
2021-09-17
親子食譜︱免焗檸檬芝士蛋糕
2021-09-17
烘焙食譜︱士多啤梨拿破崙蛋糕
2021-09-16
韓式食譜|春川辣炒雞排
2021-09-15
查看更多   ▸