【小小豬】暖身補身黨參北芪瘦肉湯
2017-01-29
突然好想飲湯，但又冇乜諗頭煲咩好。依個時候最好就係去相熟藥材店，請店主介紹下合時靚湯啦！
店主話嚟緊天氣開始凍，最好就係煲多啲補而不燥嘅暖身湯水，就係咁佢就幫我執左一份藥材，我就煲個黨參北芪瘦肉湯啦！
黨參補中益氣、生津養血；北芪有補氣固表之用；杞子則滋腎、潤肺、補肝、明目(網上資料)。今次份量唔係太多，煲起大約有五碗湯左右，不過咁都夠晒我地三口子啦！
黨參、北芪、玉竹及淮山各半両、杞子一湯匙、圓肉一湯匙、豬肉眼約$35~
瘦肉洗淨汆水；其他藥材浸洗一陣~
煲內放約3L水，待水滾後加入所有材料~
先用大火煲半小時~
然後轉慢火加蓋煲一個半小時~
最後加少少鹽調味就飲得啦~
雖然係藥材煲湯，不過飲落又真係唔多覺有任何藥材味，啖湯仲好甜，唔係自己讚自己，都真係幾好飲。最好就係飲完之後都會覺得暖笠笠，真係啱晒冬天飲呢！
溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！
更多小小豬的湯水:
作者：小小豬的成長日誌